Ég fæddist 4/5 2003 kl. 2:18
og var þá 3920 gr og 52,5 cm.

M Y N D A A L B Ú M

- LINKAR -
Karen Rut
Mamma
Imba frænka
Reynar frændi
Jóhanna Helga og Þuríður Anna
Katrín Eva
Sigmar og Clara
María Fönn frænka
Fannar Máni frændi
Þórunn Magnea
Auður frænka
Róbert Bergmann frændi
Guðmundur Magnús frændi
Rut og Ágúst Óli
Gísli Matthías #3
Katla
Oddný og Freyja
Árni Pétur
Brynja Björk frænka
Emma Guðrún
Kata föðursystir
Hrafnhildur Rós og Co


Frá byrjun:

Nýr:

Gamalt
Weblog Commenting by HaloScan.com

07 janúar 2007


GLEÐILEGT ÁR! :)



27 desember 2006

Image Hosting by PictureTrail.com

Haldiði að maður sé ekki orðin fræg? Það fréttist af þessari mynd á heimasíðu hljómsveitarinnar Sigur Rósar. Ég fór á tónleika með þeim í Öxnadalnum í sumar með pabba og Siggu og skemmti mér alveg konunglega. Ég er mjög músíkölsk í mér og diskurinn Ágætis byrjun ómaði á geislanum þegar mamma var að rembast við að koma mér í heiminn á sínum tíma. Kannski er ég svona hrifin af Sigur Rós þess vegna......eða kannski kann ég bara gott að meta.

Hafið það annars gott yfir hátíðirnar.
Stóóóórt Agnesar-knús.



29 nóvember 2006



Hæ hó! Loksins komnar nýjar myndir.

Tíminn líður svo hratt. Það er svo margt búið að gerast að undanförnu að það yrði of langt mál að tíunda það allt hér.

Mömmu langar samt að skila sérstöku þakklæti til guðmæðra minna Ágústu og Imbu fyrir að vera svo yndislegar að passa mig um daginn. Mér líður svo vel hjá þeim.

Svo eru mér ómetanleg tengslin við ömmur mínar og afa og ég tala mikið um þau þegar ég hef hitt þau. Ég tek líka stundum símann hennar mömmu og segi: "Mamma, hringja í ömmu!"
Helga amma er svo iðin við að kenna mér stafi, liti, tölur og slíkt og ég sýni því svo mikinn áhuga. Ég á mínar helgu stundir með Þórði afa snemma á helgarmorgnum þegar mamma fer með mig til Njarðvíkur. Þá vakna ég og labba fram til afa og fæ lýsi og morgunmat og hann spjallar við mig.
Amma Bobba og afi Gísli eru alltaf jafn yndisleg og færa mér eitthvað fallegt og snúllast í mér eins og hinum barnabörnunum (sem eru orðin 2o talsins + 3 barnabarnabörn). Nóg að gera þar hjá miklu barnafólki.

Rut og Clara frænkur mínar hafa verið svo góðar að gefa mér föt af sér og það eru sko forréttindi því þær eru svo miklar pæjur.

Ég er farin að skrifa heilu "sögurnar" á blöð og í litlar bækur og svo les ég þær fyrir mömmu (sem á mjög bágt með að skella ekki upp úr). "Prinsessan fór að greiða hárið og svo kom prinsinn og vondi drekinn og svanurinn og þá kom mamma og fór í vinnuna að læra". Jahá!

Ég fór með mömmu í heimsókn til Guðnýjar Evu (vinkonu mömmu) og Ásdísar Evu litlu og Sigrún og Víðir Davíð (ofurtöffari) komu með. Mér fannst Víðir og Rökkvi (vinur minn af Labrador kyni....ef mamma fer rétt með, hundar eru ekki hennar sérgrein) endalaust fyndnir og ég var voða blíð og góð við Ásdísi Evu. Hún er svo sæt og mikið krútt.

Annars eru jólin framundan og það kemst lítið annað að hjá mér nema jólasveinar og pakkar. Mamma var að reyna að segja mér eitthvað um boðskap jólanna um daginn, jesúbarnið og svoleiðis. Þá sagði ég hróðug: "Ég fór með pabba og Siggu í kirkjuna og sá jesú og konuna!" (prestinn og djáknann). : )




15 nóvember 2006


Með pabba í fjöruferð í brjáluðu íslensku veðri : )



01 október 2006

Image Hosting by PictureTrail.com

Halló halló.

Loksins skrifar mamma inn fréttir af mér. Það sem helst hamlar því að hún hefur bloggað um mig er að hún kann ekki nógu vel á myndavélina og myndirnar eru allar m.o.m. úr fókus einhvern veginn. Hana langar svo að hafa mynd af mér með blogginu. Hún þarf að drífa sig í að læra á hana hjá fyrirtæki sem selur svona vél. Hún fékk nokkrar myndir í þetta sinn frá pabba. Mjög flottar myndir.

Það að vera skilnaðarbarn eins og ég (og reyndar 30% barna á Íslandi) hefur í för með sér áherslur sem móta mig á annan hátt er fjölskyldubörn. Fyrst foreldrar mínir áttu ekki saman af einhverjum ástæðum þá ber þeim skylda til þess að veita mér það öryggi, umhverfi, athygli, tíma, aga, festu og ást sem möguleg er á tveimur stöðum. Það er margsannað með viðtölum við börn að þau kjósa heldur alla kosti foreldra sinna á tveimur stöðum en að vera á brotnu heimili eða heimili þar sem stöðug spenna, stress og ósætti ríkir. Mamma og pabbi eru góðir foreldrar þó að þau séu ekki háskólamenntuð í uppeldisfræði. Þau eru að gera sitt allra besta til þess að ég njóti mín sem best. Auðvitað reka þau sig á eins og aðrir foreldrar en þá er líka hlutverk þeirra hlusta á fólk sem þykir vænt um þau og mig. Mamma varð að koma þessu að vegna þess að hún veit að fólk hefur skoðun á þessu, eðlilega, og allir vilja mér vel. Það þykir svo mörgum vænt um mig, litla gleðigjafann.

Ég er hreinlega búin að fara á kostum undanfarið. Ég kann að skrifa Agnes, Gilli og Olga. Ég bað sjálf um að læra að skrifa þessu orð og er mjög iðin við að skrifa stafi og læra þá. Um daginn spurði ég mömmu: "Mamma, hvernig skrifa ég HJARTA?" og mamma taldi upp stafina og þurfti bara að sýna mér "R". Ég teikna ekki mynd án þess að skrifa "sögu" á hana líka. Helga amma var að gera krossgátu um daginn og ég horfði heilluð á hana skrifa alls konar stafi í rúður. Mig langaði að prófa og ætlaði að fara að hjálpa ömmu að skrifa stafi í rúðurnar með henni. Amma hló mikið. Mamma lét mig fá krossgátu úr Fréttablaðinu og ég settist niður góða stund. Mamma skoðaði svo afraksturinn og sá þar "GILLI" og "AGNES" en einnig "HOR", "HAHA" og fleiri "orð" sem ég hafði fyrir tilviljum myndað með því að raða saman stöfunum. Mamma geymir þessa krossgátu.

Ég fer oft í símaleik við sjálfa mig og labba um allt með leiksímann minn og er þá oftast og iðulega að "spjalla" við Karen. Um daginn spurði mamma þegar ég var loksins búin í símanum: "Hver var í símanum?" Ég svaraði: "Systir mín!" og mamma spurði: "Hvað heitir hún?" (bara svona til að leika við mig). Þá sagði ég bara hneyksluð: "Hún heitir Karen. Vissirðu það ekki?"
Ég sat til borðs með mömmu og Imbu frænku og eins og kerlinga er siður þá blöðruðu þær út í eitt einhverja samhengisleysu...bla bla bla bla. Ég horfði á þær til skiptis dágóða stund og sagði svo hátt: "Borða fyrst, tala svo!" Þær hlógu einhver ósköp. Ég er svo mikil dúlla.

Ég fór í gær með pabba á Ronju ræningjadóttur skemmti mér konunglega. Í dag fór ég svo með honum í strætó og hann sagði að ég hefði skemmt mér jafn vel í strætó eins og á Ronju. Það er því ódýr og sniðug skemmtun að fara með börn í strætó. Svaka spennó. Ég er líka búin að fara í berjamó bæði með mömmu og pabba í haust.

Ég er ofsalega duglega stelpa og er á "bleika prinsessu-skeiðinu". Ég verð alltaf að vera í kjól eða pilsi. Verð alveg brjáluð ef ég má það ekki. Svo verð ég að klæða mig sjálf og sný þá stundum nærbuxunum á öfuga vegu, reyni að toga upp að mitti gatinu sem á að fara utan um lærið. Stundum er erfitt að eiga við mig því að ég get verið fýlugjörn (segi "uhm" ef ég fæ ekki mínu framgengt) og það má ekki segja mér til (hef það frá pabba, við erum bæði naut...hahahaha). Annars er ég líka með dramadrottingar-takta eins og mamma. Ég hef líka kosti frá þeim sem of langt mál yrði að telja hér upp....he he.

Það er búið að klippa á mig topp og það fer mér alveg svakalega vel. Það var svo langt í Ástu Maríu mína að mamma klippti sjálf en tókst það alveg merkilega vel.

Þangað til næst. Farið vel með hvert annað og knúsist mikið. Það geri ég!



11 ágúst 2006


Hér er ég í vinnunni hjá mömmu. Það var gaman og allir spjölluðu við mig. Ég hreinlega missti mig við að pikka á þessa reiknivél, aðallega við að láta pappírsrúlluna verða lengri og lengri. Mamma stoppaði mig af með því að ýta þar til gerðum takka til hliðar (print off) en ég fylgdist svo vel með að ég ýtti honum bara aftur á sama stað og hélt áfram og glotti stríðnislega.

Þannig er ég voða mikið um þessar mundir, algjör páfagaukur, hermi eftir öllu sem sagt er og gert. Ég er að hamast við að vera eins sjálfstæð og ég kemst mögulega upp með. Ég fór með mömmu í Borgarfjörðinn um verslunarmannhelgina og þar var bálköstur kveiktur eins og alltaf og ég fylgdist með afa setja tré og greinar á bálið og Jónasi úr efsta bústaðnum sprauta vatni úr slöngu í kringum bálið og raka saman greinum. Ég hermdi svo bara eftir þeim með litlu lúkunum mínum við mikinn fögnuð viðstaddra. Jónas kreysti síðustu steinolíudropana á bálið og sagði "Jæja, olían búin!" Ég strunsaði þá af stað að bústað ömmu og afa og mamma í humátt á eftir og spurði mig hvert ég væri að fara. Ég sagðist vera að ná í olíu. Mamma varð steinhissa um hvernig ég vissi um olíu og fór með mér. Þá fór ég bara inn í eldhús, opnaði ísskápinn og teygði mig í matarolíu - sigri hrósandi. Málið dautt! Mamma hló mikið. Ég er svo mikill gleðigjafi og grallari.

Sama kvöld rauk ég aftur af stað ein kappklædd í regngalla, lopapeysu og stígvél að bústað ömmu og afa (sem er dágóður spölur fyrir stuttar lappir). Það fór enginn með mér strax en ég leit við öðru hverju til að athuga. Afi ákvað að elta mig og það var líka eins gott því ég var að fara að gera númer eitt og tvö og ætlaði að redda mér sjálf. Ekkert kjaftæði. Ég er farin að loka og læsa að mér (með svon krækju) WC í bústaðnum og vil fá mitt privacy. Skeini mig sjálf og allt. Ég lendi samt í smá tékki þegar ég kem fram og látin þvo mér um hendurnar. :)



24 júlí 2006

Image Hosting by PictureTrail.com


Hæ og hó!
Jæja, þetta er nú búið að vera meira flíspeysu-sumarið! Loksins lét þessi gula sjá sig og þá líka var hennar notið í botn. Ég er búin að vera aðeins á faraldsfæti í fríinu mínu, fór með mömmu í Borgarfjörðinn til ömmu og afa þar sem ég uni mér alltaf vel á róluvellinum og við að dunda mér endalaust. Ég er svo dundsöm og dugleg að leika mér. Ég og mamma fórum svo með þeim í bíltúr upp í Hrútafjörð. Þar var svaka stuð að henda steinum og greinum í sjóinn og pissa í fyrsta skipti úti í náttúrinni. Ég var svo hrifin af því að ég pissaði meira að segja sjálf í grasið rétt við sumarbústaðinn án þess að láta nokkurn vita og blotnaði reyndar pínulítið á bossanum við það. Svona er nú sjálfsbjargarviðleitnin sterk hjá mér....í báða leggi. Ég er líka mikið búin að vera í Njarðvík því þar er svo gott að vera og kynntist þar þremur frændsystkinum sem eru afa og ömmubörn fólksins við hliðina. Mamma tjaldaði á blettinum og það var sko leikið sér allan daginn úti í garði. Núna um helgina fór ég með pabba og Siggu til Eyja og verð eitthvað áfram í fríi með þeim. Ég var búin að bíða lengi eftir að hitta Karen systur mína. Ég er alltaf að hringja í hana í þykjustusímann minn og spjalla heillengi við hana. Mömmu finnst það endalaust sætt.
Ég er líka svakalega hrifin af Kristjáni frænda og Imbu frænku. Þau nenna endalaust að jaskast í mér og sýna mér athygli. Líka Þórður afi og Helga amma. Það er svo gott að eiga þau öll að. Ég og mamma erum svo þakklát fyrir það.

Mamma var að setja inn nýjar myndir! Endilega kíkið á!



25 júní 2006

Fleiri myndir!
Image Hosting by PictureTrail.com

Image Hosting by PictureTrail.com



18 júní 2006

Image Hosting by PictureTrail.com

Hæ og hó!

Jæja, þá drattaðist mamma loksins til að setja inn pistil og nokkrar myndir.

Ég sýni þroskabreytingar nánast daglega og mömmu og pabba finnst svo gaman að fylgjast með því. Ég hef svakalega stórt skap og er dugleg að láta heyra í mér og er mikill réttlætissinni. Það þýðir ekkert lengur að hlusta á mig nema með fullri athygli. Þegar mamma og amma voru að spjalla saman (svona eins og týpískar kellingar: BLA BLA BLA) sagði ég bara: "Þið hætta að tala!", því ég vildi komast að.

Það eru tveir ungir menn sem eru að sjá um okkur á minni deild, Vesturengi, annar þeirra er Loftur (svona blíð og róleg Jamaica týpa) og hinn er alltaf með gítar (Heiðar í Botnleðju) og það er svo þægileg svona klassísk gítartónlist ómandi þegar ég kem á morgnana. Ekkert smá indælt svona í morgunsárið. Væri munur ef þetta væri svona á öllum vinnustöðum, þó að það væri ekki nema í hálftíma. Þrátt fyrir þetta sakna ég Evu Daggar minnar mjög mikið, en hún hætti vegna þess að hún fékk svo lág laun - eins og þetta allt góða fólk yfirleitt.


Í gær var sautjándi júní í (í þessu líka blíðskaparveðri!!) og eins og þið sjáið myndinni held ég á mynd þar af langömmu minni, Jónu Ingibjörgu Örnólfsdóttur, sem fæddist einmitt 17. júní 1911 (á 100 ára afmæli Jóns Sigurðssonar forseta og skírð í höfuðið á honum og Ingibjörgu konu hans) og hún hefði orðið 95 ára í gær.

Ég fór með Helgu ömmu og mömmu út að Garðskagavita í dag og skoðaði fjöruna og sagðist "finna lykt" þegar ég fann sjávarlyktina. Ég er þó ekki alveg óreynd í þeirri lykt því ég hef nokkrum sinnum farið með pabba á tuðruna úti á sjó í Eyjum. Langafi minn var nú líka Binni í Gröf og þetta er því í blóðinu. :)



10 maí 2006

Image Hosting by PictureTrail.com



04 maí 2006

Ég er þriggja ára í dag!

Image Hosting by PictureTrail.com



Mamma var að bæta inn fyrirsætumyndum af mér og setja í nýtt albúm.
Kíkið endilega á!



20 apríl 2006

Image Hosting by PictureTrail.com

Hæ hæ og gleðilegt sumar!

Hér er alveg glæný mynd af mér og Sollu stirðu sem pabbi tók fyrir utan Lyfju áðan. Ég hitti Sollu og það var svakalega gaman. Svo hitti ég líka Bangsímon í Kringlunni og hann er í miklu uppáhaldi hjá mér.
Pabbi er búinn að útbúa handa mér herbergi í Vesturberginu með Bangsímon myndum og þema. Ég er að sjálfsögðu í skýjunum með það.
Ég er ekki bara farin að pissa í klósett eins og ekkert sé, heldur vil ég alltaf skeina mig sjálf. Alltaf að gera allt sjálf, takk fyrir. Fæ samt hjálp eftir nr. 2, það þarf aðeins meiri færni við það. ;)
Fleiri myndir eru komnar í albúmið. Kíkið á.



04 apríl 2006

Ég er svo mikill rokkari!

Image Hosting by PictureTrail.com

Mamma var í foreldraviðtali í morgun og Eva Dögg hópsstjóri sagði að ég hefði mörg skapeinkenni. Ég er mjög góð, blíð og dundsöm annað veifið og hoppandi glöð en læt sko vel heyra í mér ef mér mislíkar eitthvað, læt ekki vaða yfir mig.

Besta vinkona mín heitir Kristín og við erum eins og síamstvíburar. Ef einhver er að stríða annarri hvorri okkar þá grípur hin inn í og ver með kjafti og klóm. Konunum á leikskólanum finnst það endalaust sætt. Ég stóðst þroskaprófið mjög vel en á eitthvað í erfiðleikum með að hoppa jafnfætis á sama stað, er alltaf "skoppandi". : )

Eva segir að ég sé mikill þjónn í mér, alltaf réttandi öllum allt og kannast pabbi og mamma vel við það því að ég er alltaf að "búa til kaffi" eða "baka" eða "búa til mat". Þá rétti ég þeim eitthvað og segi: "Gelleleees" (gjörðu svo vel).

Ég hef tekið breytingunum frá því í október mjög vel, enda hafa mamma og pabbi kappkostað að sýna mér þá hlýju og athygli sem ég þarf í sitt hvoru lagi og ég er jafn mikið hjá þeim báðum. Ég er í betra jafnvægi en ég var fyrir þann tíma samkvæmt Evu og virðist hafa góða hæfileika í að aðlagast breytingum yfirleitt.

Ég er búin að mynda verulega góð geðtengsl við stóran hóp af nánustu ættingjum mínum og held t.d. mikið upp á Kristján móðurbróður og djöflast í honum þegar ég hitti hann. Hann er svona "Hlynur-inn" í mömmu fjölskyldu. ; )

Það eru komnar inn einhverjar nýjar myndir. Mamma setur ekki inn mikið af myndum aðallega vegna þess að myndabrunnurinn er svo lítill að hún þarf að henda heilu albúmunum út í staðinn. Það er svo sárt að horfa á eftir þeim.



23 mars 2006

Image Hosting by PictureTrail.com

Ég var í klippingu og mömmu finnst ég allt í einu vera orðin svo stór. Litlu páskaungahnoðrahnakkinn minn er ekki lengur til staðar nema þegar ég er nývöknuð. Ég er samt alveg rosalega fín og skoðaði mig í speglinum í allt gærkvöld.
Ragnheiður vinkona mömmu klippti mig og ég fékk að skoða litlu sætu Þórunni Magneu í leiðinni. Hún er endalaust sæt með stóru brúnu augun sín. Það er loksins kominn linkur á hana hér til hliðar.

Mamma tók eftir um daginn að ég fór að syngja Mikka ref úr Dýrunum í Hálsakógi í bílnum án þess að það væri í útvarpinu svo að mamma spilaði það í tölvunni þegar við komum heim. Ég tók þetta líka svakaleg tilþrif og ég söng ekki bara með mini-Mikka refs-svip og hló hlátrinum hans, heldur potaði ég höndunum út um allt eins og ekta rappari. Mamma náði þessu á videó og sá sko ekki eftir því, hló mikið. Ég er svo skemmtileg.

Ég var aðeins lasin í vikunni, með kvef og hósta en er fljót að ná mér og mamma er viss um að Latabæjarvítamínin og lýsið sem ég fæ hjá pabba hjálpa þar mikið til.

Það eru fleiri myndir af nýju klippingunni í albúminu, kíkið á.



07 mars 2006

Go ahead - make my day!

Image Hosting by PictureTrail.com

Ég er svo kúl. Ég fór á hestbak í Vestmannaeyjum um helgina með pabba og ég er ekki bofs hrædd við þessar stóru skepnur. Alveg óð í að sitja á baki. Svo sit ég bara með Clint Eastwood augnaráðið og held mér ekki einu sinni í. Það er í lagi á meðan hesturinn stendur kyrr.

Annars er ég mjög ánægð í nýju íbúðinni með mömmu í Funafoldinni og ég hlakka til að fá nýju nágrannana á efri hæðina. Þangað mun stelpa flytja sem er þrettán ára og hún hlakkar til að fá að leika við mig og passa mig. Ég hlakka líka mikið til þess að hitta hana og bróður hennar, sem er átta ára.

Ég á góða vinkonu sem heitir Sigga og mér þykir ofsalega vænt um hana. Mamma veit að Sigga er góð og skemmtileg við mig og er henni mjög þakklát fyrir það.

Ég sagði mömmu brandara í fyrsta skipti í gær og hann hljómaði einhvern veginn svona: "Einu sinni var tómatur að labba á götunni og þá kom bíllinn og þá sagði hún tómatssósa" svo hló ég rosalegum tilgerðarhlátri og mamma meig næstum í nærurnar því henni fannst ég svo fyndin. Mömmu grunar líka að pabbi hafi kennt mér brandarann......



03 febrúar 2006

Image Hosting by PictureTrail.com




16 janúar 2006

Ég á nýjasta og sætasta frænda í heimi.
Sjáið þið bara hvað ég er montin með hann!




09 janúar 2006

Bara ef þið vissuð það ekki þá elska ég Clöru frænku ofsalega mikið.
Sést það kannski?
Image Hosting by PictureTrail.com
Það verður alveg að viðurkennast að við erum eiginlega ALVEG EINS og feður okkar á þessari mynd.

Guðforeldrar mínir, Ágústa og Hlynur, eignuðust yndislega flottan og heilbrigðan strák 4. janúar. Það er kominn linkur á heimasíðuna hans og hér er mynd af honum. Oh, ég hlakka svo til að hitta nýjasta frænda minn (og n.k. guðbróður). ;)




29 desember 2005


Halló allir saman!


Jæja hvað tíminn líður hratt. Loks dreif mamma í að setja inn nýjar myndir og einhvern texta hér. Sko gömlu.
Ég er búin að stækka og þroskast svo ört á stuttum tíma. Mamma og pabbi taka stundum andköf yfir setningunum sem ég get látið út úr mér. Um jólin var mamma eitthvað að hvíla sig inni í herbergi og ég labbaði til hennar, kveikti ljósið og slökkti aftur og spurði svo mömmu: "Er betra að hafa slökkt?"
Ég var um jólin í Njarðvík og pabba var hjá okkur á aðfangadagskvöld. Það var æðislegt kvöld og ég fekk svo mikið af pökkum að það var verið að opna þá til klukkan ellefu. Skemmtilegustu gjafirnar voru tvímælalaust Sollu stirðu búningurinn sem pabbi og mamma gáfu mér, Barbie kjóllinn og leikföngin sem Imba gaf mér, eldavélin með steikingarhljóðunum sem Kristján gaf mér og hljóðneminn frá Ágústu og Hlyni. Svo fékk ég dúkku frá ömmu og afa í Vestmannaeyjum og Karen sem segir pabbi og mamma, hlær og grætur og heimasaumuð geggjuð dúkkuföt frá Guðnýju vinkonu mömmu. Þetta er fyrir utan öll fallegu fötin, bækurnar og allt hitt. Ég er í skýjunum og dunda mér mikið og dansa og syng.

Það urðu breytingar á heimilishögum mínum í október, ég er með lögheimili hjá mömmu en er elskuð á fleiri stöðum í staðinn. Ég er búin að standa mig eins og hetja enda á ég góða foreldra sem eru miklir vinir og samstíga í að vera mér góðar fyrirmyndir og láta mig njóta alls hins besta.
Það er komið nýtt albúm með nokkrum myndum. Við bætum svo fleirum við fljótlega. Kíkið á!



08 október 2005



Hæ hó og dillidó!

Jæja, nú þykir mér mamma vera orðin löt að uppfræra síðuna. Það er næstum mánuður frá síðasta bloggi.
Talandi um að standa sig ekki, ég er farin að taka upp á því að ef ég er ekki alveg sátt við mömmu og pabba, t.d. þegar þau eru of upptekin til að leika við mig, þá segi ég: "dodduu" (komdu) og leiði þau (í sínu hvoru lagi) inn í herbergið mitt, segi þeim að setjast á rúmið mitt, fer fram og loka hurðinni! Á maður ekki annars að nota sömu aðferð og þau?
Ég er komin á Austurengi á Engjaborg, sem þýðir að ég er búin að færast "upp" um deild. Ég er ekkert alveg sátt við þetta, sakna Hófíar og Eru og segi alltaf á morgnana: "Ekki Aussuengi"! Annars segja leikskólakennararnir á Austurengi að ég sé alveg rosalega dugleg stelpa. Þær segja að ég þekki stafi orðið svo vel og hin og þessi orð og myndir af uglum og öðru.
Jæja, það eru komnar einhverjar myndir í viðbót. Kíkið á.

Agnes sjarmatöffari.



09 september 2005



Hæ hó!

Eins og þið sjáið á nýju myndunum hef ég stækkað órtúlega mikið á stuttum tíma og tekið út mikinn þroska. Ég hef eins og aðrir leikskólakrakkar verið að grípa einhverjar umgangspestir en ónæmiskerfið styrkist um leið. Ég er búin að læra nokkra stafi; A (Agnes), B (Berglind), G (Gilli), H (Helga), I (Imba), K (Karen, Kristján), L (Ljónið), S (Siggi, Sigmar) og Þ(Þórður) og pabbi var svo góður að kaupa stórt plakat með stafrófinu og mér finnst svo gaman að finna stafina sem ég þekki. Hann keypti líka andlitsmálningaliti og eins og þið sjáið líka á myndunum er búið að vera stuð að prófa þá. Ég er svo dugleg stelpa og yndisleg knúsikellng.



22 ágúst 2005

Karen Rut er 10 ára í dag.
Innilega til hamingju elsku systir.




16 ágúst 2005

Okkur langar að vekja athygli á heimasíðu Frosta, Ingibjargar og hinnar nýskírðu og yndislegu Maríu Fannar frænku.


Linkurinn er hér til hliðar.


Hér er ein mynd af Maríu Fönn. Hún er endalaust sæt.






08 ágúst 2005




Hæ hæ!


Þá er ég komin heim úr fyrstu útlandaferðinni minni. Það var svaka fjör. Ég blaðraði tóma "Agnesku" við allra þjóða krakka og lét þá bara heyra það ef þeir reyndu að standa fyrir mér í rennibrautunum. Mamma og pabbi áttu bágt með að skella ekki upp úr.
Ég naut mín í botn í skemmtigörðum, tívolíum og dýragarði og fannst tækin svakalega skemmtileg. Ég var soldið mikið að storka mömmu og pabba með því að hlaupa hratt af stað í burtu, sérstaklega þegar þau eru með fullar hendur af töskum. Þau voru að reyna að gera mér grein fyrir hættunni við að hlaupa út á götur og ég virtist stundum skilja það en stundum ekki.
Annars var ég alveg ótrúlega góð og þolinmóð í bílnum alla þessa leið sem við keyrðum....um 3000 km. Það heyrðist varla í mér og ég söng og lék mér og dansaði við bangsa á milli þess sem ég svaf 2-3 tíma í einu. Draumasamferðalangur, enda hef ég ferðast mikið frá því ég var nokkurra vikna. Svo er ég svo taktviss og söngelsk og mikil brandarakelling að ég stytti mömmu og pabba stundir á leiðinni líka. Var með hvílík atriði í gangi. Pabbi keypti prumpublöðru í molli í Köben og ég var svo ánægð með hana að ég labbaði með hana um allt og settist á hana á 10 skrefa fresti með tilheyrandi hljóði svo að fólk kipptist við. Mamma þurfti að setjast - hún hló svo mikið.

Það eru komnar nýjar myndir úr ferðinni í albúmið. Svona sýnishorn. Kíkið endilega á!



24 júlí 2005




Hæ hæ!


Jæja nú styttist óðum í að ég fer með mömmu og pabba til Danmerkur og til útlanda í fyrsta skipti. Ég elska flugvélar og þegar mamma var að keyra Karen á flugvöllinn þegar hún var að fara heim til Eyja vildi ég fara með í "flúvelina". Ég fæ sko að fara í eina riiisastór þá. Það er búið að vera yndislegt að hafa Karen hjá okkur og við höfum gert ýmsilegt skemmtilegt saman. Hluti af því sést í nýjasta albúminu.
Amma Bobba og afi Gísli ætla að vera í íbúðinni okkar og passa hana á meðan. Talandi um ömmur og afa, þá er skellti ég mér með Helgu ömmu og Þórði afa í bústaðinn núna í sólarhring vegna þess að mamma og pabbi þurfa að vinna svo mikið á morgun. Mamma er að leysa af í gömlu vinnunni sinni hjá Jónunum og svo byrjar skólinn aftur í lok ágúst. Eftir að við komum heim frá Danmörku ætlar hún að vera með mér í eina viku af sumarfríinu mínu frá leikskólanum en hún hefur alveg misst af því og mér vegna þess að hún réði sig fyrr í vinnuna en hún ætlaði. Það er bara hið besta mál.
Ég er afskaplega ákveðin ung stúlka með sterkar skoðanir og læt sko ekki gabba mig auðveldlega. Ég er skapstór og sýni það í orðum og verki en getir verið svo ljúf og yndisleg, labbandi á milli heimilisfólksins til að knúsa það. Þá segi ég: "Mamma gó" og "Pabbi gó" (góð) en "Mamma lei" og "Pabbi lei" (leiðinleg/ur) þegar mér mislíkar eitthvað. Það svoleiðis renna úr mér ný orð daglega og ég hika ekki við að sulla saman 7 orða setningum til að láta í ljós hvað ég vil. Þá fær mamma alveg sting í hjartað, tekur mig í fangið og knúsar mig.



03 júlí 2005




Við frænkurnar erum soddan prinsessur. Myndirnar voru teknar í afmæliskaffi mömmu í gær. Það er svo gaman að sjá hvað við erum ólíkar.......litlar stelpuútgáfur af Gilla og Sigga.



29 júní 2005




Þegar mamma sá þessa mynd í tölvunni eftir að hafa tekið hana í morgun þegar ég var nývöknuð, eðlileg og fersk, áttaði hún sig á því hvað ég er orðin stór. Ég hef þroskast svo hratt á svo stuttum tíma. Kannski hefur hún haft svona mikið að gera í sumarskólanum og ekki verið með mér eins oft og venjulega. Allavega, hún varð að henda þessari mynd á síðuna mína til að sýna ykkur hvað ég er orðin stór.
Það var fyrst í gær sem ég sagði "AGNES" allan daginn. Þetta hefur verið að smá koma hjá mér, enda erfitt nafn fyrir litla tungu að bera fram. Ég hef ýmist sagt "Sagge" eða "Agges" og var farin að pota inn "Agnes" öðru hverju.
Ég er farin að tala einhver ósköp...margra orða setningar. Rosalega dugleg.
Ég sagði pabba að passa sig á bílunum um daginn: "Pabbi passa bíl" með tilheyrandi varnartilþrifum.
Ég fer í fyrsta sumarfríið mitt 11. júlí og eina sem er ákveðið er Damnerkurferð yfir þjóðhátíðina.



30 maí 2005




Hæ hæ.


Brjálað að gera að undanförnu. Fór á ættarmót hjá Þórðar afa fjölskyldu og hitti þar hrúgu af ættingjum á öllum aldri. Gaman að hitta þetta fólk því það hittist alltof sjaldan.

Í gær leyfði Berglind hans Sigga okkur að koma með sér, Sigmari og Clöru að Grjóteyri við Meðalfellsvatn. Þar býr Hildur, móðursystir Berglindar. Þangað hafa leikskólar farið í einhver 30 ár og staðurinn hefur vakið mikla lukku enda öll aðstaða alveg meiriháttar. Ég alveg missti mig í dýrafansinum, hélt á kettlingum, klappaði hundum, hænum, kiðlingum, lömbum, kálfi og folöldum. Ég heimtaði að fara á bak á einu þeirra og þrátt fyrir að það yrði ekkert sérlega upp með sér þá hló ég og skríkti endalaust. Þarna var mjólk í svona ókeypis mjólkursjálfsölum svo að ég drakk örugglega 5 glös af ískaldri mjólk þarna. Svo var hægt að róla, klifra, renna og leika sé á gömlum traktorum. Þar sýndi ég stóra skapið mitt til að fá að vera helst á þeim öllum í einu. Ég fékk líka að vaða í læk og það var nú ekki leiðinlegt, sko. Ég hitti þarna Árna Pétur og foreldra hans en þau voru þarna með leikskólanum hans.

Imba frænka kemur heim til landsins á morgun eftir langa 5 mánaða dvöl í Frakklandi. Ég er sko ekki búin að gleyma henni (segi alltaf IBA þegar ég sé myndir af henni) og það verður gaman að hitta hana og knúsa aftur!
Það eru komnar nýjar myndir í albúmið. Kíkið endilega á!



25 maí 2005

TVÍFARI MINN!




Þetta er Alexander Máni, frændi minn. Hann er sonur Halldórs Grétars og Ingu Rutar, en Halldór Grétar og pabbi eru systrasynir. Það fyndna við hvað ég og Alexander erum lík er að hann er miklu líkari mömmu sinni en pabba sínum. Kannski eru mamma og Inga Rut eitthvað skyldar og vitum ekki af því....hmmmm?
Mamma og hún urðu að láta okkur hittast vegna þess að hún hefur haft orð á því hvað við erum lík. Þau komu svo til okkar á sunnudaginn og það var svakalega gaman að fá þau í heimsókn. Foreldrum okka fannst endalaust fyndið að fylgjast með samskiptum okkar. Ég var á fullu að passa dótið mitt og segja "skamm" en hann hlustaði ekkert á mig og skoppaði um alla íbúð eins og lítil jarðýta og naut sín í botm. Alveg yndislegur. Það var ekki séns að ná mynd af okkur saman því gátum ekki verið kyrr og eðlileg í eina sekúndu saman. Ég endaði þó á því að leggja niður vopn og varnir þegar komið var farasnið á frænda og kyssti hann á kinnina eins og góðri frænku sæmir. Alexander þurrkaði slefið af kinninni eins og sönnu karlmenni sæmir með svaka tilþrifum. Það varð allt brjálað af hlátri.



16 maí 2005



Hæ hæ. Það er sko búið að vera gaman að lifa að undanförnu. Afmælið mitt um daginn og fullt af skemmtilegum gestum. Svo hafa mamma og pabbi verið dugleg að fara með mig út á róló-ana sem eru úti um allt og hjóla með mig líka. Ég er voða hrifin af köngulóm (ólíkt mömmu, ömmu og langömmu) og vil alltaf sjá köngulóna í Litlu lirfunni og er ekkert smeyk við hana. Pabbi sýndi mér eina pínulitla á bryggjunni og mig langaði að pota í hana.
Við fórum í sumarbústaðinn í Borgarfirðinum eina nótt um hvítasunnuhelgina og Birgir Theódór, annar tvíburasona Ása móðurbróður kom með afa ög ömmu. Ég var ekkert smá hrifin af honum, hélt í eyrun á honum, kyssti hann og knúsaði og hann leyfði mér að hamast á sér skellihlæjandi á gólfinu. Hann sýndi mér mikla þolinmæði sem ég kann vel að meta. Mér fannst svo gaman að koma í Borgarfjörðinn eins og alltaf og vildi helst vera úti í róló allan tímann.
Ég kann að telja upp í tíu! Kom mömmu og pabba aldeilis á óvart í fyrradag, var að leika mér og taldi upp í átta og svo bættu þau við níu og tíu. Algjör snilli. Mamma tók það að sjálfsögðu upp á videó en við kunnum ekki að sýna það á síðunni.
Mamma kom líka að mér inni í herberginu mínu þar sem ég sat nákvæmlega eins og hún sat alltaf langt fram eftir aldri og hún skellihló en ég skildi ekkert hvað vara svona fyndið. Þið sjáið það nánar á einni myndinni í albúminu.

Powered By Blogger TM